Hutbe e ditës së xhuma nga Meka e bekuar 19-12-1447 H 05-06-2026 D
Shejh Jaser Ed-Dosari
Tema Qëndrueshmëria në fe
Lavdërimet janë për Zotin, i Cili ka caktuar lavdi dhe sukses për ata që i binden dhe i frikësohen Atij, poshtërimin dhe turpërimin për ata që nuk i binden dhe sfidojnë urdhrin e Tij. Zotin e Madhërishëm e lavdëroj me lavdërimin e atij që pranon favorin e Zotit të tij, Atë e falënderoj, mirësia e Tij është e bollshme për ata që e marrin Atë si mbrojtës të tyre.
Dëshmoj se nuk ka Zot tjetër veç Allahut, Një i Vetëm, pa shok, nuk ka fitore përveçse duke iu bindur Atij, nuk ka pasuri përveçse duke pasur nevojë për mëshirën e Tij.
Dëshmoj se Muhamedi është rob i Zotit dhe i dërguari i Tij. Paqja, mëshira dhe bekimet e Zotit qoftë mbi atë, familjen e tij, shokët e tij dhe ata që ecin në udhëzimin e tij.
Në vijim
Kini frikë Zotin dhe binduni Atij fshehurazi dhe hapur, jini nga ata që i frikësohen madhërisë së Zotit të tyre dhe kanë frenuar vetet e tyre nga dëshirat, dhe pajisuni me gjërat që ju nevojiten për rrugë dhe dijeni se pajisja më e mirë është devotshmëria.
Haxhinjë, mysafirë të të Gjithëmëshirshmit! Një nga sezonet më të mëdha ka kaluar dhe ditët e Haxhit kanë mbaruar me të gjitha përfitimet dhe shpërblimet e tyre. O ju që iu përgjigjët thirrjes! Urime për këtë zgjedhje! Mbërritët nga vende dhe qytete të largëta, duke ardhur grupe-grupe para Zotit, qëndruat para portës së Tij në grupe të mëdha, nderuat vendet dhe ritualet e shenjta dhe duke shpallur Njëshmërinë e Zotit në vendet e shenjta. Urime për përfundimin e Haxhit tuaj, për bekimet dhe favoret që Zoti ju ka dhuruar. “Thuaj: “Me dhuntinë e Allahut dhe mëshirën e Tij – vetëm me këto le të gëzohen! Kjo është më e mirë se ajo që grumbullojnë.”(Junus 58)
Zoti ju mëshiroftë! Dijeni se nga shenjat e Haxhit të pranuar, shenjë e kënaqësisë dhe miratimit është vazhdimësia në bindjen ndaj Zotit dhe të qëndruarit i palëkundur në të. Prandaj, vendosmëria në fenë e Zotit ka qenë qëllimi i njerëzve të besimit dhe furnizimi i njerëzve të mirësisë. Ajo është fortesa e fortë, shtylla e fortë, shkëmbi i fortë përballë stuhive dhe mali i lartë përballë përrenjve të tërbuar. Përmes saj, vendosmërisë, natyrshmëria e lindur mbrohet nga devijimi, mendjet mbrohen nga rrëmbimi dhe zemrat ruhen nga paqëndrueshmëria dhe largimi.
O besimtarë! Qëndrueshmëria në fe është porosi e Zotit të Plotëfuqishëm për të dërguarin dhe të zgjedhurin e Tij, për profetin dhe të dalluarin e Tij. Zoti i Lartësuar ka thënë: “Andaj, lartësoje Zotin tënd me lavde e falënderime dhe bëhu prej atyre që i përulen Atij (duke u falur)! Dhe adhuroje Zotin tënd derisa të të vijë vdekja!”(El-Hixhr 98-99)
Nga Enesi, Zoti qoftë i kënaqur me të, transmetohet se i dërguari i Allahut, paqja dhe mëshira e Zotit qoftë mbi të, e thoshte shpesh lutjen: “O Ti që i rrotullon zemrat, bëj zemrën time të qëndrueshme në fenë Tënde.” Kështu që unë i thashë: “O i Dërguar i Zotit, ne të kemi besuar ty dhe në atë me të cilën ke ardhur, dhe përsëri ke frikë për ne?” Ai tha: “Po, me të vërtetë zemrat janë midis dy gishtërinjve të Zotit, Ai i kthen, rrotullon ato si të dojë.” Hadithi është transmetuar nga Tirmidhiu.
Zoti i Plotëfuqishëm e ka bërë të qartë se qëndrueshmëria është mirësi që u jepet njerëzve besimtarë në këtë botë dhe në botën tjetër. Zoti i Plotëfuqishëm ka thënë: “ Allahu i forcon besimtarët me fjalë të qëndrueshme në këtë botë dhe në botën tjetër, kurse keqbërësit i shpie në humbje; Allahu bën ç’të dojë.” (Ibrahim 27)
Ata që qëndruan të palëkundur ishin të sinqertë dhe këmbëngulës, qëndruan në rrugë të drejtë dhe nuk devijuan. Me mirësinë e Zotit, ata merituan që Melaiket të zbresin mbi ta me lajme përgëzuese në kohën e vdekjes, për të larguar frikën dhe pikëllimin prej tyre dhe për t’u dhënë lajme të gëzuara për triumfin e madh dhe vendbanimin fisnik në Kopshtet e Lumturisë, në Xhenet. Zoti i Plotfuqishëm ka thënë: “ Me të vërtetë, atyre që thonë: “Zoti ynë është Allahu”, e pastaj vazhdojnë të vendosur në rrugën e drejtë, do t’u zbresin engjëjt (para vdekjes) e do t’u thonë: “Mos u frikësoni dhe mos u pikëlloni! Dhe gëzojuni Xhenetit që ju është premtuar.”(Fussilet 30)
Ebu Bekër Es Sidik, Zoti qoftë i kënaqur me të, ka thënë: “Ata janë që nuk i shoqëruan asgjë Zotit dhe nuk iu drejtuan asnjë Zoti tjetër përveç Tij.”
O muslimanë! Qëndrueshmëria ka arsye, kush i përmbush ato, me lejen e Zotit, do ta arrijë qëllimin dhe dëshirën e tij, kështu Zoti do e mbajë të palëkundur në udhëzim dhe do e mbrojë nga devijimi dhe shkatërrimi.
Më e madhja nga këto arsye është: Arritja e monoteizmit, Njësimit të Zotit në adhurim, të kapurit pas Zotit dhe mbështetja tek Ai. Zoti i Plotfuqishëm ka thënë: “ Vetëm Ty të adhurojmë dhe vetëm prej Teje ndihmë kërkojmë. Udhëzona në rrugën e drejtë!” (El-Fatiha 5-6)
Pastaj, të kapurit pas Librit të Zotit, Kuranit, dhe sunetit të profetit të Tij, paqja dhe mëshira e Zotit qoftë mbi të, me njohuri dhe kuptim, me dituri dhe veprim. I dërguari i Allahut, paqja dhe mëshira e Zotit qoftë mbi të, e këshilloi umetin e tij me këtë parim të madh, duke thënë: “Unë kam lënë midis jush dy gjëra, me të cilat, nëse i përmbaheni fort, nuk do të humbisni kurrë rrugën: Librin e Zotit, Kuranin, dhe sunetin e profetit të Tij.” Hadithin e ka transmetuar Imam Maliku.
Kush mbahet fort pas tyre nuk do të rrëshqasë, as nuk do t’i humbasë mendja, nuk do ta rrëmbejnë dyshimet dhe nuk do ta tundojnë dëshirat. Zoti i Plotëfuqishëm ka thënë: “Thuaju se atë (Kuranin) e ka zbritur Shpirti i Shenjtërisë nga Zoti yt me të vërtetën, për t’i forcuar ata që besojnë dhe për të qenë udhërrëfyes dhe lajm i mirë për ata që i dorëzohen Allahut.”(En-Nahl 102)
Nga shtyllat e qëndrueshmërisë në fenë e Zotit është respektimi, zbatimi i metodologjisë së paraardhësve të drejtë dhe të kuptuarit e tyre. Nga El Irbad Ibn Sarijeh, Zoti qoftë i kënaqur me të, tregohet se i dërguari i Allahut, paqja dhe mëshira e Zotit qoftë mbi të, ka thënë: “Përmbajuni sunetit tim dhe sunetit të kalifëve të udhëzuar drejt, kapuni fort pas tij dhe mbajuni pas tyre me dhëmballët tuaj.” Hadithin e ka transmetuar Ebu Daudi.
Përmbajuni mësimeve të tyre, ndiqni rrugën e tyre dhe kërkoni udhëzim nga trashëgimtarët e tyre midis dijetarëve të ditur dhe drejtohuni atyre, veçanërisht kur ndodhin fatkeqësi dhe lindin dyshime, sepse dijetarët janë fenarë të udhëzimit dhe largues të errësirës.
Nga mjetet më të mëdha të qëndrueshmërisë është lutja drejtuar Zotit të Lartësuar, dhe kërkimi prej Tij qëndrueshmëri në fenë e Tij deri në vdekje. Nga lutjet e besimtarëve, sikurse ka ardhur në Kuran: “(Ata thonë:) “O Zoti ynë! Mos lejo që zemrat tona të shmangen (nga e vërteta), pasi na ke udhëzuar në rrugën e drejtë, dhe jepna mëshirë prej Teje; vërtet, Ti je Dhuruesi i madh!”(Al ‘Imran 8)
Nga gjërat që e ndihmojnë qëndrueshmërinë e njeriut është përkujtimi i vazhdueshëm i Zotit të Plotfuqishëm, sepse ai është litari lidhës dhe furnizimi i shpresuar. Zoti e ka lidhur përkujtimin me qëndrueshmërinë në situatat më të vështira dhe sfiduese, si dhe në rrethanat më të errëta dhe më të rrezikshme, sikurse Zoti i Plotëfuqishëm dhe i Lartësuar thotë: “O besimtarë, kur të ndesheni me ndonjë forcë armike, qëndroni të patundur dhe përmendni shumë Allahun që të fitoni!”(El-Enfal 45)
Nga arsyet për të qëndruar të palëkundur në fenë e Zotit është shoqëria e mirë. Nga Ebu Hurejra, Zoti qoftë i kënaqur me të, tregohet se i dërguari i Allahut, paqja dhe mëshira e Zotit qoftë mbi të, ka thënë: “Njeriu është në fenë e mikut të tij, prandaj le të shikojë çdo njëri prej jush se me kë miqësohet.” Hadithin e ka transmetuar Tirmidhiu.
Nga arsyet e qëndrueshmërisë është braktisja e gjynaheve dhe veprave të këqija, dhe ndarja nga gabimet dhe shkeljet. Nga Ibn Mes’udit, Allahu qoftë i kënaqur me të, tregohet se i dërguari i Zotit, paqja dhe mëshira e Zotit qoftë mbi të, ka thënë: “Bëni kujdes nga gjynahet e vogla, sepse ato grumbullohen tek njeriu derisa ta shkatërrojnë atë.” Hadithin e ka transmetuar Ahmedi.
O robër të Zotit! Jini të qëndrueshëm! Sa e mrekullueshme është bindja kur pasohet nga bindja, sa e bukur është e mira kur pasohet nga e mira. Mjerë ai person që shkatërron atë që ka themeluar dhe rrënon atë që ka ndërtuar. Zoti i Lartësuari dhe i Madhërishëm ka thënë: “Mos u bëni si ajo gruaja që e shprish dhe e bën fije-fije atë që e ka tjerrë fort…” (En-Nahl 92)
Hasan El Basriu, Zoti e mëshiroftë, ka thënë: “Vërtetë Zoti nuk ka vendosur ndonjë kufi për veprat e besimtarit përveç vdekjes.” dhe pastaj recitoi fjalët e Zotit të Plotfuqishëm dhe të Madhërishëm: “Dhe adhuroje Zotin tënd derisa të të vijë vdekja!”(El-Hixhr 99)
Adhurues të Zotit! Zotit i kërkoj falje për vete dhe ju, tek Ai kërkoni falje, me të vërtetë Ai është Falës i madh, Mëshirëplotë.
Hutbeja e dytë
Lavdërimet janë për Allahun, Rrotulluesin e zemrave dhe të syve.
Paqja dhe mëshira e Zotit qoftë mbi profetin tonë të zgjedhur, Muhamedin, mbi familjen dhe shokët e tij të pastër.
Në vijim
Haxhinjë të Shtëpisë së Shenjtë të Zotit, Qabes, mysafirë të të Gjithëmëshirshmit! Zoti pranoftë Haxhin tuaj dhe përpjekjet tuaja. Zoti i sjelltë këto sezone të bekuara neve dhe juve për shumë vite dhe periudha të gjata kohore. Zoti i shpërbleftë sundimtarët tanë në emër të dy xhamive të shenjta dhe vizitorëve të tyre, Haxhinjëve, kryerësve të Umres dhe vizitorëve, me shpërblimet më të mira. Zoti i bëftë përpjekjet e tyre të vlerësuara, shkruajt për ta shpërblime të bollshme, siguroftë për ata dhurata bujare dhe shpërblime të mëdha. Sepse midis gjërave që gëzojnë zemrën, dhe frymëzojnë krenari dhe nder, dhe që meritojnë lavdërime dhe falënderime, janë hapat e ndërmarra nga udhëheqja e mençur në këtë vend të bekuar, nga përpjekjet e mëdha dhe të lavdërueshme dhe veprat e vlerësuara dhe të dëshmuara. Të cilat, me suksesin e Zotit, kanë rezultuar në një arritje të madhe për sezonin e Haxhit këtë vit, në një seri arritjesh të njëpasnjëshme për sezonet e Haxhit vit pas viti, Zoti e përjetësoftë këtë nder të madh për vendin tonë të bekuar.
Adhurues të Zotit! “ Vërtetë Allahu e bekon të Dërguarin dhe engjëjt e Tij luten për të. O besimtarë, lutuni për të dhe përshëndeteni me selam.” (El- Ahzab 56)
O Zot, mëshiroje Muhamedin dhe familjen e tij, siç e mëshirove Ibrahimin dhe familjen e tij, në të dy botët me të vërtetë Ti je i Lavdishëm dhe i Madhëruar.
O Zot, bekoje Muhamedin dhe familjen e tij, siç e bekove Ibrahimin dhe familjen e tij, në të dy botët me të vërtetë Ti je i Lavdishëm dhe i Madhëruar.
O Zot, të lutemi të jesh i kënaqur me katër Halifet e parë të drejtë, udhëheqësit e drejtë, me të gjithë shokët e profetit, me tabi’inë dhe ata që i pasojnë në vepra të mira deri në ditën e Kijametit, dhe me ne së bashku me ata, me Faljen, Bujarinë dhe Mirësinë Tënde, o më i Madhi Bujar.
O Zot, lartëso Islamin dhe muslimanët, mbro ndjekësit e fesë.
O Zot, bëje këtë vend të paqtë, të sigurt dhe të begatë, dhe të gjitha vendet e muslimanëve, o Zoti i botëve.
O Zot, pranoje nga Haxhinjtë, bëj Haxhin e tyre të pranuar, përpjekjet e tyre të shpërblyera dhe gjynahet e tyre të falura.
O Zot, bëj udhëtimin e tyre të lumtur, kthimin e tyre të lavdëruar dhe bëj rrugën e tyre rrugë paqeje dhe sigurie.
O Zot, të lutemi që t’i japish sukses dhe arritje udhëheqësit dhe kujdestarit të çështjeve tona, kujdestarit të dy xhamive të shenjta, mbretin Selman, d dhe zëvendësit të tij të kurorës, princit Mohamed Ibn Selman. O Zot, shpërbleji ata në emrin tonë, në emër të vendit dhe popullit, dhe në emër të Islamit dhe të muslimanëve me shpërblimet më të mira.
O Zot, ndihmo njerëzit e sigurisë tonë dhe ushtarët tanë në kufijtë tanë, ruaj ata me mbrojtjen Tënde dhe mbuloi ata me kontrollin Tënd, dhe mbroji ata me kujdesin Tënd, shpërbleji ata dhe të gjithë ata që Zoti i ka nderuar duke u shërbyer mysafirëve të të Gjithëmëshirshmit me shpërblimin më të mirë.
O Zot, largo shqetësimet e atyre që janë të shqetësuar, largo të vështirat e atyre që janë në vështirësi, mundëso larjen e borxheve atyre që janë në borxhe, shëro të sëmurët tanë dhe të sëmurët e muslimanëve. O Zot, mëshiro të vdekurit tanë dhe të vdekurit e muslimanëve.
O Zot, ndihmo muslimanët e shtypur në Palestinë dhe kudo tjetër. O Zot, mbro xhaminë Aksa, bëje atë të fortë dhe krenare deri në Ditën e Gjykimit.
Adhurues të Zotit! “Në të vërtetë, Allahu urdhëron drejtësinë, mirësinë dhe ndihmën për të afërmit, si dhe ndalon imoralitetin, veprat e shëmtuara dhe dhunën. Ai ju këshillon, në mënyrë që ju t’ia vini veshin.” (En –Nahl 90)
Përmendeni Allahun Ai ju kujton ju. Përkujtimi i Allahut është gjëja më e madhe.
Allahu është i Ditur për çfarë veproni.
Afrim Smakaj
