Hutbe e ditës së Xhuma nga Xhamia El Aksa 18-01-1448 H 03-07-2026 D
Shejh Halid Ebu Xhumua
Tema Siguri, besim dhe bindje në ndihmën e Zotit
Lavdërimet janë për Zotin, i Cili lartëson ata që i binden dhe i frikësohen Atij, poshtëron ata që nuk i binden dhe sfidojnë urdhrat e Tij. Ai u jep qetësi atyre që besojnë në Të dhe i frikësohen Atij, lëshon tmerr në zemrat e atyre që nuk besojnë në Të dhe e kundërshtojnë Atë. Ai i shpërblen me mirësinë e Tij ata që këmbëngulin në bindjen dhe kënaqësinë e Tij.
Dëshmoj se nuk ka Zot tjetër veç Allahut, Një i Vetëm, pa shok. Nuk ka Zot tjetër të denjë për adhurim përveç Tij. Ai i Cili i përgjigjet thirrjes së kujtdo që i lutet Atij dhe udhëzon këdo që kërkon udhëzimin e Tij. Kush strehohet në mbrojtjen e Tij, Ai e mbron atë, kush kërkon ndihmën e Tij, Ai e ndihmon atë dhe kush mbështetet tek Ai, i mjafton atij.
Dëshmoj se i dashuri, ndërmjetësi, mbështetësi dhe shembulli ynë, Muhamedi, paqja dhe mëshira e Zotit qoftë mbi të dhe mbi familjen e tij, është rob i Zotit, i dërguari dhe i përzgjedhuri i Tij. Udhëtoi natën për në Bejtul Makdis, Kuds, dhe gjeti mbështetjen e Tij. Ai u ngjit në qiejt e Tij dhe pa atë që pa nga madhështia e Mbretërisë. Zoti e solli pranë dhe e afroi. Paqja, mëshira dhe bekimi i Zotit qoftë mbi të, mbi familjen e tij, shokët e tij dhe mbi ata që e pasuan.
Në vijim
O robër të Zotit! Kini frikë Zotin dhe binduni Atij, jini të sinqertë ndaj Tij në veprat tuaja, mbështetuni tek Ai në fatkeqësitë tuaja, kërkoni ndihmën e Tij në vështirësitë tuaja, kërkoni Atij t’ju plotësojë nevojat tuaja, kërkoni strehim tek Ai në atë që ju frikëson, sepse Ai, Zoti i Lartësuari, është i aftë për gjithçka dhe përfshin çdo gjë. Zoti i Madhërishëm dhe i Lartësuar ka thënë: “ Ai është i Sunduesi mbi robërit e Vet; Ai është i Urti dhe ka dijeni për gjithçka.”(El-En’am 18)
Kini frikë Zotin e Plotfuqishëm fshehurazi dhe publikisht, sepse nuk ka sukses për ju përveçse duke pasur frikë Zotin. Kush i frikësohet Zotit do të jetë i lumtur në këtë botë dhe në botën Tjetër, Ahiret. “O besimtarë! Kijeni frikë Allahun ashtu si i takon Atij dhe vdisni vetëm duke qenë muslimanë!” (Al ‘Imran 102)
“O Allah, Ty të lutemi për siguri në ditën e frikës së madhe”, kjo ishte një nga lutjet e profetit, paqja dhe mëshira e Zotit qoftë mbi të.
I dërguari i Allahut, paqja dhe mëshira e Zotit qoftë mbi të, ka thënë: “ Kush prej jush që zgjohet i sigurt në shtëpinë e tij, i shëndetshëm në trup dhe ka ushqim mjaftueshëm për ditën e tij, është sikur i është dhuruar e gjithë bota.”
Në mes të lajmeve të shpërndara dhe furrës së ngjarjeve të njëpasnjëshme, ku thashethemet gëlojnë, njerëzit janë goditur nga ankthi dhe shqetësimi, është shfaqur frika tek ata dhe të menduarit e planifikimi ua lodhën mendjet. Frikë dhe panik, trazim dhe ankth, pesimizëm dhe dëshpërim, sy që nuk shikojnë gjë tjetër veçse një pamje të zymtë dhe një të ardhme të paqartë.
Ku është besimtari në thellësitë e këtyre errësirave, situatave?! Cila është rruga drejt sigurisë së tij dhe rruga drejt shpëtimit të tij? Si mund ta gjejë besimtari paqen në këtë botë mes të thellësisë së frikës?! O adhurues të Zotit! Me besimin në Zot!
O ju durimtarë! Besimtari gjen paqe me Zotin, është i bindur se vetëm Zoti ka sundim, Ai që menaxhon universin me diturinë, urtësinë, drejtësinë dhe mëshirën e Tij. Asgjë që lëviz nuk mbetet e palëvizshme, asgjë që është e palëvizshme nuk lëviz, asnjë gjethe nuk bie përveçse me lejen dhe vullnetin e Tij. Zoti i Lartësuar ka thënë: “Allahu i di të fshehtat e qiejve dhe të Tokës dhe çdo gjë kthehet tek Ai. Lutju Atij dhe mbështetu tek Ai! Zoti yt nuk është i pavëmendshëm ndaj asaj që bëni ju.”(Hud 123)
Besimtari e di se ajo që Zoti Një i Vetëm dëshiron ndodh, e ajo që Ai nuk dëshiron, nuk ndodh, se vetëm Zoti, Ai i Vetëm, është ashtu siç e përshkroi Ai Veten: “Allahu ka kontroll dhe fuqi të plotë mbi çështjet e Tij, por shumica e njerëzve nuk e dinë.”(Jusuf 21)
Besimtari është i sigurt se mëshira, dobia dhe mirësia janë në duart e Tij, Zotit të Lartësuar, se askush nuk posedon për vete ose për të tjerët dobi ose dëm, as vdekje, as jetë, as ringjallje. Allahu i Plotëfuqishëm ka thënë: “ Thuaj: “Do të na godasë vetëm ajo që na ka caktuar Allahu; Ai është Mbrojtësi ynë dhe vetëm tek Allahu le të mbështeten besimtarët!”(Et-Teube 51)
Ky ajet është gdhendur në zemrat e besimtarëve, kështu që ata u qetësuan dhe pasuan besimin në Zotin dhe Sunduesin e tyre.
O ju të lidhur me këtë vend! Besimtari është i sigurt se vetëm Zoti i menaxhon punët dhe përcakton fatet, jep jetë dhe vdekje, mban dhe dhuron, jep dhe privon, ulën dhe ngre, zotëron krijesat dhe atë që ata zotërojnë, zotëron zemrat e tyre, dëgjimin dhe shikimin e tyre, i jep pushtet kujtdo që dëshiron mbi këdo që dëshiron në çfarëdo mënyre që dëshiron dhe e frenon këdo që dëshiron nga kushdo që dëshiron në çfarëdo mënyre që dëshiron. I Lartësuar është Ai në madhështinë e Tij, Ai përfshin të gjitha gjërat me dije dhe fuqi, Zoti i Plotëfuqishëm ka thënë: “Allahut i përket gjithçka që gjendet në qiej dhe gjithçka që gjendet në Tokë dhe Allahu i përfshin të gjitha (në dijen e Tij).”(En-Nisa’ 126)
O ju muslimanë! Populli shtypës, i padrejtë, shikon tiraninë me ushtarët e tij, që mbushën tokën, detin dhe ajrin, por Zoti është i ditur me atë çfarë ata bëjnë, çfarë planifikojnë dhe komplotojnë. Me këtë bindje, besimtari sigurohet nga vendimet e Zotit të Plotfuqishëm, sepse ai është nën mbrojtjen dhe ruajtjen e Zotit, nën kujdesin dhe mbështetjen e Tij, në sigurinë dhe mbrojtjen e Tij. Ai nuk dorëzohet tek askush përveç Zotit, as nuk mbështetet tek askush përveç Tij, sepse vetëm Ai është mbrojtësi dhe ndihmësi.
Qetësia dhe paqja janë një dhuratë hyjnore, bekim qiellor, të cilin Zoti e ka vendosur në zemrat e besimtarëve në mënyrë që ata të qëndrojnë të palëkundur në kohë vështirësish dhe fatkeqësish, dhe t’i nënshtrohen caktimit të Zotit me kënaqësi. Paqja e Zotit është mbi zemrat që kanë lexuar ajetin: “Ai drejton çdo çështje, prej qiellit deri në Tokë…” (Es-Sexhde 5) Kështu që i ka lënë çështjet në dorën e Atij që është përgjegjës.
Paqja e Zotit është mbi zemrat që kanë lexuar ajetin: “Vërtet, pas vështirësisë – vjen lehtësimi!”(Esh-Sherh 6)
Ai e kuptoi se Zoti, me fuqinë e Tij, e shndërron natën e të shtypurve në mëngjes, thyerjen e tyre në forcë dhe lotët e tyre në buzëqeshje.
Paqja e Zotit është mbi zemrat që kanë lexuar ajetin: “ Vërtet, zemrat qetësohen me përmendjen e Allahut!”(Er-Ra’d 28) Kështu Ai i dha zemrës qetësi shpirtërore dhe ajo u kthye tek Zoti në të gjitha rrethanat e saj Zoti i Plotfuqishëm ishte streha dhe mburoja e saj, mbështetja dhe përkrahja e saj, e vërteta ishte drejtimi i saj i lutjes dhe shpëtimi i saj në kohë vështirësish dhe fatkeqësish.
O ju të lidhur me këtë vend! Robi besimtar shikon jobesimtarët dhe hipokritët duke komplotuar dhe duke luftuar kundër Zotit dhe të dërguarit të Tij, për ta penguar, larguar nga rruga e Zotit, sikurse shikon bashkë me ta mjetet e fitores dhe forcës çfarë nuk janë me njerëzit e besimit, megjithatë ai nuk dëshpërohet as nuk bëhet pesimist, sepse e di se fjala e Zotit është më e larta, e di se harta e popujve nuk vizatohet në salla të mbyllura, dhe se fatet nuk shkruhen nga anëtarët e tubimeve të errëta, por përkundrazi gjithçka ndodh vetëm me caktimin dhe vullnetin e Zotit. Prandaj ai nuk e humbën shpresën nga mëshira e Zotit, as nuk demoralizohet, as nuk njeh dëshpërim, por ai gjithmonë ka mendim të mirë për Zotin e tij, Allahun e Plotëfuqishëm.
Ky është udhëzimi i profetit, paqja dhe mëshira e Zotit qoftë mbi të, kur ai shikonte lehtësim me intensifikimin e fatkeqësisë, përgëzonte, u jepte lajmin e gëzuar, shokët e tij për çlirim qytetesh kur ishin të rrethuar dhe të sulmuar, i përgëzonte ata me fitore, siguri, pasuri dhe forcë, pavarësisht vuajtjeve, varfërisë dhe dobësisë së tyre. Ai, paqja dhe mëshira e Zotit qoftë mbi të, ishte optimist në të gjitha çështjet e tij, duke i besuar Zotit të tij në çdo kohë dhe duke pasur mendim të mirë për Të në të gjitha rrethanat e tij. Kështu, jeta e tij, paqja dhe mëshira e Zotit qoftë mbi të, pavarësisht ashpërsisë, vuajtjeve, pikëllimit, shqetësimit, vështirësive, torturave dhe zhvendosjes nga vendi dhe vendlindja e tij, ishte plot shpresë, optimizëm dhe besim në fitoren dhe fuqizimin e Zotit në tokë. Ky është udhëzimi i profetit, paqja dhe mëshira e Zotit qoftë mbi të.
O ju namazfalës! Ajo që po përjetojmë sot nga vuajtjet, shqetësimet dhe vështirësitë është vetëm një urdhër që Zoti i Plotfuqishëm e cakton për besimtarin me urtësinë dhe drejtësinë e Tij, me qëllim që të dallojë të vërtetën në durimin dhe mbështetjen e tij, që t’ia pastrojë zemrën nga lidhja me botën, nga zbukurimet e saj dhe nga arroganca e kënaqësive të saj. Kjo është sprovë e besimit të tij para se të jetë sprovë e jetës së tij.
Adhurues të Zotit! Mos u pikëlloni për këtë botë nëse ju kalon, për sa kohë që besimi është i vendosur fort në zemrat tuaja, sepse kjo botë është një hije dhe një ofertë kalimtare, prandaj përgëzoni dhe mos u dëshpëroni. Vështirësitë janë çështje të natyrshme ndërsa sprovat janë ligjshmëri universale, prandaj mos u dëshpëroni. Zoti juaj është Bujar dhe mos u dëshpëroni, sepse feja juaj është fe madhështore. Mos u dëshpëroni pavarësisht se çfarë bëjnë të ligjtë me muslimanët, sepse ata nuk do ta dëmtojnë fenë ose besimin e tyre.
Transmetohet nga Abdullah Ibn Abasi, Zoti qoftë i kënaqur me ata të dy, se një burrë tha: “O i dërguar i Zotit, cilat janë gjynahet e mëdha?” Ai tha: “Ti shoqërosh shok Zotit dhe të humbasësh shpresën nga mëshira e Zotit.” Ndërsa në një transmetim tjetër: “Të humbasësh shpresën nga mëshira e Zotit dhe të humbasësh shpresën në dhembshurinë e Tij.”
Zotit i kërkoj falje për vete dhe për ju, fitorja është me ata që tek Zoti kërkojnë falje, tek Ai kërkoni falje.
Hutbeja e dytë
Lavdërimet janë për Allahun, Zotin e botëve. Atij i takon çdo lavdërim i mirë dhe lëvdatë e bukur. Paqja dhe mëshira e Zotit qoftë mbi më të nderuarin e të dërguarve, zotërinë e të parëve dhe të fundit, zotërinë tonë Muhamedin, paqja dhe mëshira e Zotit qoftë mbi të, mbi familjen e tij dhe të gjithë shokët e tij.
O ju të lidhur me këtë vend! Historia është pasqyrë për kohën. Ajo është dritarja e së tashmes mbi të kaluarën, dokumenti i së tashmes për të ardhmen. Historia nuk ka nxjerrë në pah një çështje në të cilën u manifestuan parimet tona ligjore, të drejtat tona historike dhe shkëlqimin tonë qytetërues, siç është ruajtja e kibles së parë, xhamisë së dytës për nga vjetërsia dhe xhamisë së tretë për në të cilat kërkohet udhëtimi. Në të është shkëlqimi i zotërisë së dy botëve kur ai u mor në Udhëtimin e Natës dhe prej andej u ngjit në qiejt më të lartë.
Vërtetë, sa i madh dhe sa i bekuar është Kudsi! Ajo është më e bukura nga të gjitha banesat, lulja e qyteteve, nusja e arabëve, e prejardhjes fisnike, nderi i tij është i lartë, dinjiteti i tij është i ruajtur, është i çmuar dhe bujar, i lartë dhe krenar, vetëm me Islamin dhe muslimanët.
Qyteti i Kudsit është i një niveli të lartë, rrënjët e tij shtrihen thellë në zemrat tona përpara se të jenë thellë në histori. Faqet e tij të ndritshme mbështeten në kufijtë e kohës, shenja lavdie dhe krenarie me të cilat muslimanët nderohen dhe krenohen me përkatësinë e tyre me të.
Këtu ndodhet xhamia e bekuar Aksa, të cilën Zoti i Plotfuqishëm e lidhi me xhaminë e shenjtë në Meke dhe e përjetësoi përmendjen e saj në Kuran që do të lexohet deri në Ditën e Kijametit. I dërguari fisnik, paqja dhe mëshira e Zotit qoftë mbi të, e shpjegoi vlerën e saj, kur ka thënë: “Udhëtimet duhen ndërmarrë vetëm në tre xhami: Në këtë xhami timen, në Medinen e Ndritshme, në xhaminë e shenjtë, Qabe, dhe në xhaminë Aksa.”
Kjo xhami e juaja është xhami e madhe dhe e bekuar, shtëpi e shenjtë, kodër e bekuar me themele të forta dhe burim, tokë e pastër dhe e shenjtë, vendi i adhurimit të profetëve, udhëtimi i natës i vulës së të zgjedhurve dhe streha e shokëve të tij besnik. Kjo është e denjë të jetë e gjallë në zemrën, mendjen dhe kulturën e muslimanëve dhe të nxjerrë në pah rëndësinë e saj kudo, e kjo është detyre e tyre,: Në libra, në shkrime, revista, kurrikula, kolegje dhe universitete, në media dhe në të gjitha rastet. Sepse ajo është xhamia Aksa të cilën sytë e shikojnë dhe e dëshirojnë, zemrat e duan dhe luten që të jenë në të. Balli e dëshiron dhe përmallohet për mihrabin e saj, për oborret e saj, për ambientet e saj dhe platformat e saj, që të gjunjëzohen dhe të bëjnë sexhde, të prekin thelbin e zemrave që dëshirojnë pozicionin e sexhdes, pozicionin e afërsisë me Zotin në shtëpinë e shenjtë, me nënshtrim dhe qetësi, në një vend ku manifestohen adhurimi dhe spiritualiteti i vërtetë.
O Zot, na bëj prej atyre që janë të lidhur me xhaminë Aksa, na mbaj në këtë gjendje, pa ndryshuar dhe pa u lëkundur. Zoti i Plotëfuqishëm ka thënë: “O besimtarë! Bëhuni të durueshëm dhe nxiteni njëri-tjetrin për të qenë të tillë; bëhuni të vendosur dhe vigjilentë (në vepra të mira dhe në ruajtjen e kufijve) dhe kijeni frikë Allahun, që të shpëtoni!”(Al ‘Imran 200)
O Zot, të lutem të jesh ndihmë e dobishme, mbështetje e fortë dhe mbrojtje për ne. O Zot, na mëshiro me mëshirën Tënde të gjerë dhe largo fatkeqësitë nga ne. O Zot, poshtëro armikun tonë dhe ata që na bëjnë keq. O Zot, shëro plagët tona, ushqe të uriturit tanë, shuaj etjen tek njerëzit tanë, mbulo të zbathur nga ne, vish të zhveshurit tanë, shëro të plagosurit tanë dhe mëshiro të vdekurit tanë. O Zot, ji i Butë me të moshuarit e përgjunjur, me foshnjat e vogla, që ushqehen me gji, me gratë që kanë mbetur të veja dhe me fëmijët që ngelen jetimë.
O Zot, kjo është xhamia jonë e Aksasë, ruaj atë dhe ata që e ruajnë atë, janë të lidhur me të, fortifikoje atë me fortifikimin Tënd të fortë, mbaje atë nën kujdesit, ruajtjen, mbrojtjen, sigurinë dhe garancinë Tënde, o më i Madhi më Bujari.
O Zot, lartëso Islamin dhe muslimanët! O Zot, fale popullin musliman me të gjallët dhe të vdekurit e tij, o Zoti i botëve.
“Në të vërtetë, Allahu urdhëron drejtësinë, mirësinë dhe ndihmën për të afërmit, si dhe ndalon imoralitetin, veprat e shëmtuara dhe dhunën. Ai ju këshillon, në mënyrë që ju t’ia vini veshin.” (En –Nahl 90)
Përmendeni Allahun Ai ju kujton ju, falënderojeni Atë për mirësitë e Tij do t’ju jap më shumë.
“… vërtet, përmendja e Allahut është më e madhe! Allahu di gjithçka që ju bëni.” (El-Ankebut 45)
Afrim Smakaj
